Основното јавно обвинителство Струмица донесе наредба за спроведување истражна постапка против две лица, на возраст од 32 и 31 година. Првиот е осомничен за кривично дело „убиство“ од член 123 став 1 во врска со член 19 (во обид) од Кривичниот законик, а вториот е осомничен за поттикнување да го изврши делото.

Како што информира Jавното обвинителство, на 17 јули во раните утрински часови, во магацински простории на дискотека во Струмица, првоосомничениот со намера се обидел да лиши од живот две лица, а второосомничениот со умисла го поттикнал да го стори кривичното дело.

По претходна вербална расправија меѓу второосомничениот и еден од оштетените, двајцата осомничени дошле во магацинските простории на дискотеката. Првоосомничениот во рака држел пиштол марка ЦЗ ВЗОР 50 со кој се заканувал, додека второосмничениот му упатил удар со бокс на еден од оштетените.

Започнале меѓусебно да се борат и паднале на земја, по што првоосомничениот се обидел да испука со пиштолот во оштетените, додека второосомничениот за цело време го охрабрувал да пука. Едниот од оштетените станал и почнал да бега. Кога првоосомничениот почнал да го репетира пиштолот и да нишани кон вториот оштетен, бил совладан од сведок на настанот и пиштолот му бил одземен.

Јавниот обвинител до судијата на претходна постапка достави предлог за определување мерка притвор на осомничените. Предлогот е прифатен, а Основниот суд во Струмица на осомничените им определи притвор во траење од 30 дена.​

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.