Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава против полицискиот службеник С.С. од Скопје, вработен во полициска станица при СВР Скопје, поради основано сомение дека сторил кривично дело „примање поткуп“.

Како што информира денеска Министерството за внатрешни работи, на 26 јули годинава при контрола на патничко возило на автопатот Скопје-Миладиновци побарал и зел 2.000 денари за да не изготви записник и прекршочен платен налог за сторен и констатиран сообраќаен прекршок.

-Оштетеното лице потоа го пријавило случајот во полициска станица, а по преземени мерки било утврдено дека пријавениот го сторил делото и му е поднесена кривична пријава, се вели во соопштението од МВР.

Од Одделот за внатрешна контрола поднесена е иницијатива за поведување постапка за утврдување дисциплинска одговорност и предлог за отстранување од работното место до завршување на дисциплинската постапка.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.