Триесетгодишник од Тетово ноќеска двапати бил приведуван во полиција. Откако еднаш бил приведен поради прекршување на полицискиот час, подоцна, по ослободувањето, после полноќ на излегување од полициската станица почнал да навредува и агресивно да се однесува кон други полицајци на улицата „Цветан Димов“.

Десетина минути по полноќ, на ул.„Цветан Димов“ во Тетово, полициски службеници на СВР Тетово го лишиле од слобода Љ.А.(30) од Тетово, кој претходно бил лишен за „непостапување според здравствени прописи за време на епидемија“, поради тоа што ги навредувал и агресивно се однесувал кон полициските службеници кои вршеле службени дејства. По целосното расчистување и документирање на случајот, против него ќе бидат изготвени соодветни поднесоци, информираше Марјан Јосифоски, портпарол на СВР Тетово.

Инаку, во текот на изминатото деноноќие евидентирано е дека на тетовското подрачје вкупно 10 лицa не ја почитувалe забраната за движење, па се лишени од слобода и ќе следуваат соодветни поднесоци за „непостапување според здравствени прописи за време на епидемија“ (член 206 од Кривичниот законик).

Во овој период контролирани се 118 лица со решeнија и 40 лица со потпишани изјави за самоизолација, додека 20 лица биле писмено предупредени за неносење заштни маски, соопшти Јосифоски.

Според статистичките податоци на СВР Тетово, решенија за изолација од Државниот санитарен и здравствен инспекторат им се изготвени на 16 лица, а во изминатото деноноќие изјави за самоизолација потпишале четири лица.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.