И второобвинетиот за убиството на Никола Саздовски, Скендер Демири, сведочеше денеска на рочиштето во Основен суд Скопје 1, каде претходно и првообвинетиот Бесир Беља даде исказ во вкрстено испитување од неговите бранители и адвокатите на семејството Саздовски.

Тој рече дека не е виновен и дека не знае зошто воопшто застанале со автомобилот на автобуската станица бидејќи во моментот конзумирал марихуана.

Не сум виновен, ниту јас, ниту Јетон. Само Бесир има учество. Ние двајца влеговме само со намера да ги раздвоиме – изјави Демири, во исказ пред судот.

Тој додаде дека кога излегол од „мерцедесот“ на Беља видел како Јетон се упатува кон Бесир и Никола кои се туркале и го држел Бесир за да го оттргне. Во тој момент Никола се обидел да го удри Бесир, а како што кажа, тој влегол меѓу нив и се обидел да ги раздели.

Објасни дека го потурнал Никола, на кого му се сплеткале нозете и паднал, а потоа паднал и тој самиот врз него. При падот се добил гребаница покрај десното око за која не знае дали му ја предизвикал Никола или самиот се повредил. Кажа дека не збележал дали Никола е во несвест зошто се уплашил од насобраните луѓе кои почнале да ги пцујат, туку само станал и почнал да бега, а пред него бегале и Јетон и Бесир.

На прашање од одбраната, рече дека, најверојатно Никола лошо паднал и од тоа починал бидејќи од два три удари од Бесир не можел да почине, како и дека не се сеќава дали имало метален ормар на местото каде паднале со Никола.

Демири, пред судот, кажа дека пет години консумирал марихуана, а поинтензивно во последните три, но дека не купувал бидејќи имал другари кои се занимавале со тоа и секогаш кога ќе им побарал му давале. Рече дека не е зависник од марихуана и оти консумира три цигари дневно со марихуана.

Двајцата обвинети, во исказот пред судот, тврдат дека не го знаеле Никола од претходно и оти не се членови на навивачка група, туку се само симпатизери на клубот. Претходно сведошеше Беља кој рече дека не е виновен и оту му е жал за тоа што се случило.

Според обвинителниот акт, Беља и Демири заедно со Јетон Љужа (19), кој е во бегство, на 29 јуни минатата година крвнички го претепале Саздовски на автобуската постојка пред фабриката „Алкалоид” на булеварот „Александар Македонски” во Автокоманда.

Од здобиените повреди, Саздовски на 9 јули 2018 година почина на Клиниката за анестезија, реанимација и интензивно лекување – КАРИЛ во Клиничкиот центар „Мајка Тереза”.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.