Бизнисменот Адријан Амзовски, кој сведочеше во предметот за невладината организација „Меѓународен сојуз“, изјави дека според договорот, „Меѓународен сојуз“ требало да го обезбеди земјиштето за изградба на старечки домови.

Тие ветуваа дека ќе обезбедат да го купиме земјиштето во Општина Карпош по цена од 1.50 до 1.80 евра за метар квадратен, како и промена на ДУП-от, но ништо од тоа не исполнија – изјави Амзоски, за случајот во кој, заедно со основачот на организацијата, Бојан Јовановски, обвинети се уште четири лица.

Сведокот Амзовски, кој е еден од сопствениците на фирмата „Дрим билдинг“ Струга, изјави дека за проектот дознал преку Александар Димитровски, кој му кажал дека постојат три проекти со „Меѓународен сојуз“, по еден во Струга и Охрид и еден во општина Карпош, за кој тие се одлучиле.

Според договорот „Меѓународен сојуз“ требаше да го обезбеди земјиштето за градба. Ние, откако го потпишавме договорот имавме обврска да платиме 25 отсто или 16,1 милион денари фактура на авторски договор на Јасна Мандиќ. Уплативме 15 милиони денари одеднаш и рестото подоцна. Потоа требаше да чекаме „Меѓународен сојуз“ да обезбеди земјиште, да не ослободи од комуналии, ама од тоа не бидна ништо. По истекот на рокот од 180 дена побаравме да ни бидат вратени парите – изјави Амзовски.

Сведокот изјави дека, од тие пари Бојан Јовановски вкупно му вратил 155 илјади евра, во период од неколку месеци.

Немавме некој однос ние да се расправаме или нешто. Полека ги враќаше парите, се додека не го притворија. Тогаш беше јасно дека нема да ги врати парите и покренавме граѓанска постапка. Таму си ги побарувам парите и се надевам дека ќе ги вратам – изјави Амзовски.

Сведокот изјави дека на состаноците за проектот, Јасна и Бојан секогаш биле присутни, а на неколку пати и Фросина Ременски и еднаш или два пати Александар Кирацовски.

Верував во успешноста на проектот и затоа дадов толку пари. Прво бизнис планот беше добар, земјиштето во Скопје по таа цена и секако пресудно беше присуството на лицата – рече Амзовски.

На прашање од одбраната дали договорот го разгледале негови правници и го потпишал без принуда, сведокот рече – „Да“.

На прашање од Јасна Ерцеговиќ, сведокот изјави дека заедно со неа и Бојан во „Меѓународен сојуз“ ги креирале роковите за обезбедување на земјиштето за градба.

На прашање од Бојан Јовановски, дали тие како „Меѓународен сојуз“ не можеле да ја диктираат цената на градежното земјиште и се воделе од одредбите на Владата, сведокот рече – „Да“.

Случајот го води судијката Софче Гаврилова Ефремовска, а застапник на обвинението е Ивана Трајчевска.

За случајот со невладината организација „Меѓународниот сојуз“, основана од Бојан Јовановски – Боки 13, преку која според обвинението биле измамени бизнисмени за наводни центри за возрасни лица, обвинети се и Фросина Ременски, Миле Јовановски, таткото на Боки 13 и Јасна Мандиќ Ерцеговиќ.

Јовановски е обвинет за измама и перење пари. Ременски е обвинета за помагање во делото измама, Мандиќ за помагање во измамата и перењето пари, Миле Јовановски се товари за помагање во перењето пари и за неовластено изработување, држење, посредување и тргување со оружје. Како правно лице обвинета е и невладината организација.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.