Претседателот на Србија, Александар Вучиќ, искажа остри критики и навреди за Србите кои влегоа во владата на косовскиот премиер Албин Курти.

Тој ја критикуваше одлуката лидерот на Прогресивната демократска партија, Ненад Рашиќ, да биде министер за заедници на Косово, а негова советничка да биде Рада Трајковиќ, која беше на изборната листа на Рашиќ.

Вучиќ за Трајковиќ изјави дека е „српско ѓубре од дното на казанот“, а на Курти му го доделил епитетот „терористичко ѓубре“.

Изборот на Рашиќ, човек кој доби еден отсто гласови, како и на Рада Трајковиќ која беше на неговата листа, покажува дека тие сакаат прогон, протерување и исчезнување на Србите од Косово и Метохија, изјави Вучиќ за Пинк ТВ.

Вучиќ додаде дека „не постојат полоши“ од Рашиќ и Трајковиќ и дека тие немаат доверба кај Србите на Косово туку „доверба од западните агенции и терористичкото ѓубре Курти“.

Реакциите од ЕУ за именувањето на Рашиќ, српскиот претседател ги нарече срамни и нагласи дека поради тоа, делегација од Србија нема да учествува на самитот на Унијата и Западниот Балкан во Тирана.

А, за ѓубрињата терористи – внимавајте, да не повредите ниту еден Србин, заедно со овие квислинзи што ги избравте. Затоа што Србите ќе знаат да ви одговорат. А, вие од Европа, срам да ви е, а тоа е мала работа во споредба со што сакам да ви кажам“, заклучи тој.

Рашиќ на функцијата министер беше поставен откако од функцијата оставка поднесе Горан Ракиќ од редовите на Српската листа, која е поддржана од властите во Белград.

Ракиќ, како и другите косовските Срби колективно ги напуштија институциите во знак на протест поради одлуката на владата на Косово за пререгистрација на возилата со српски регистарски ознаки со РКС (Република Косово).

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.