Не постои сомнеж дека се соочуваме со опасна временска појава, рече министерот за климатска криза и цивилна заштита на Грција Христос Стилијанидис во изјавата за невремето што ја зафати цела Грција, а предизвика поплави и сериозни проблеми во Атина, на Евија, на Крф и во други делови од земјата и додаде дека „пред нас имаме тешки два дена“, јави дописничката на МИА од Атина.

Стилијанидис соопшти дека сите училишта во областа Атика, поширокиот дел на Атина, на Евија и Халкидики, утре, превентивно ќе бидат затворени, а доколку е потребно, вечерва може да се донесе одлука и за други делови на земјата.

Рече дека противпожарната служба на Грција, само во областа Атика примила над 385 повици за помош и упати апел до граѓаните да избегнуваат непотребни движења, нешто што беше побарано и преку порака испратена од бројот 112 за итни случаи, за кој Стилијанидис истакна дека во вакви ситуации е сојузник за предупредување на луѓето.

-Безбедноста на граѓаните е нашата прва грижа. Заштитата на човечкиот живот е наш прв приоритет. Ова е заедничка цел, рече Стилијанидис.

Силниот и обилен дожд и новото невреме „Балос“, предизвикаа сериозни проблеми во Атина, поплавени училишта, булевари, факултети, затворени улици и сообраќаен хаос.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.