Со 193 гласа „за“ и три „против“, пратениците на српскиот парламент ги усвоија предлог-актот за изменување и дополнување на Уставот на Србија, предлог-уставниот закон за спроведување на тој закон и предлог-одлуката за распишување референдум за потврдување на Законот за изменување и дополнување на Уставот, пишува Блиц.

Претседателот на Собранието Ивица Дачиќ ќе распише референдум за потврдување на Законот за промена на Уставот по завршувањето на вонредната седница на Парламентот, вечерва во 18.45 часот, соопштија од Собранието на Србија, пренесува Танјуг.

Како што претходно беше најавено, референдумот треба да се распише на 16 јануари.

Министерката за правда на Србија Маја Поповиќ во Собранието изјави дека судиите и претседателите на судовите во иднина ќе ги избира исклучиво Високиот судски совет.

Предложениот акт за промена на Уставот, за кој се расправаше, предвидува судиите и претседателите на судовите да ги избира исклучиво Високиот судски совет, чиј состав и начин на избор се менуваат. Така, во иднина ќе има шест члена избрани од судии од редот на судиите, четири члена од редот на истакнати правници, избрани од Народното собрание, на предлог на надлежната комисија, по јавен конкурс, од двотретинско мнозинство од сите пратеници и претседател на Врховниот суд, изјави таа.

Таа додаде дека промената на Уставот во областа на правосудството е услов за натамошна реформа на правниот систем, што, меѓу другото, ќе овозможи подобри оценки и напредок на Србија во процесот на евроинтеграциите.

Поповиќ потсети на причините за промена на Уставот на Србија, кои имаат за цел, меѓу другото, да ја зголемат правната сигурност на граѓаните, правната заштита и судењето во разумен рок.

Претседателот на Собранието Ивица Дачиќ рано вечерва распиша референдум за промена на Уставот на Србија

Дачиќ претходно денеска изјави дека референдумот за промена на Уставот во областа на правдата треба да се одржи на 16 јануари. Дачиќ рече дека дотогаш треба да бидат усвоени амандманите, при што текстот треба да се најде на собраниската седница на 30 ноември.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.