Спасувачките екипи успеале да ги извлечат српските туристи кои беа заглавени во стрмен планински предел во подрачјето на северниот албански град Тропоја. Истовремено, извлечено е и мртвото тело на српскиот турист Ѓ.С., кој најверојатно починал како последица на срцев удар.

Како што јави „АБЦ њуз“ екипа на косовската планинска служба за пребарување и спасување, со воздушна поддршка на службата за итни интервенции на Албанија, реализирала акција за извлекување на мртвото тело на алпинистот од Србија и другите кои биле со него.

Спасени се две лица, момче и девојка кои се сместени во Валбона и се во добра здравствена состојба. Според првите информации, познато е дека починатиот доживеал срцев удар и нашите екипи го однесоа телото до просторот каде што можеше да слета хеликоптерот – стои во соопштението на косовската спасувачка екипа.

Акцијата за извлекување почнала по повик во оперативната сала на Полицискиот комесаријат во Тропоја од српска туристка дека им треба помош.

Тие биле заглавени во местото викано „Врв на отворените клисури“, во месноста Валбона, кое се споредува со австриските Алпи, поради што се често посетени од туристи и алпинисти од многу земји.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.