Грчкaтa полиција испитува видео од безбедносни камери, на кое се снимени лицата кои во петокот напладне, со десет куршуми, пред неговиот дом, го убија истражувачкиот новинар, Јоргос Карајваз.

Според грчките медиуми, на видеото се гледаат две лица на скутер, а облеката и видот на моторот, одговараат на описите на очевидците. Тие се снимени на помалку од 500 метри од местото на убиството и три до четири минути претходно, а полицијата и понатаму ги прегледува сите безбедносни камери во околината.

Се погласни се шпекулациите во Грција дека станува збор за нарачано убиство, а потрагата и истрагата на полицијата се во тек, како за пронаоѓање на сторителите, така и за откривање на нарачателот или нарачателите.

Дел од грчките медиуми анализираат дека Карајваз бил ликвидиран од професионални убијци, кои можеби биле најмени од балканските земји, а се проверуваат хотелите, ер-би-ен-би становите, компаниите за изнајмување возила, како и аеродромите и копнените гранични премини.

Скутерот со кој се превезуваа двете лица, се уште не е пронајден.

Онлајн изданието на „Катимерини“ пишува дека компјутерот, автомобилот и мобилниот телефон на новинарот веќе се во Дирекцијата за криминолошки истраги на грчката полиција.

52-годишниот грчки новинар Јоргос Карајваз беше застрелан пред неговиот дом од две лица, во моментите додека се враќал од работа.

Обдукцијата покажа дека бил убиен со десет куршуми, шест во градите, два во пределот на главата, еден во вратот и еден завршил во дланката.

Во саботата грчкиот премиер Кирјакос Мицотакис се сретна со министерот за цивилна заштита Михалис Хрисохоидис од кого побара брзо расчистување на случајот и пронаоѓање на сторителите.

За убиството на Карајваз реагираа и од Европската Унија, а ладнокрвната ликвидација на искусниот новинар кој покриваше црна хроника, полиција, криминал и слично и понатаму е една од главните теми во Грција.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.