Во однос на Договорот од Преспа ние го почитуваме меѓународното право и бараме иста перцепција и од соседната земја, вели министерот за одбрана на Грција, Никос Панајотопулос во интервјуто за грчкиот весник „Реал њуз“, jави дописничката на МИА од Атина.

Панајотопулос објаснува дека минатата седмица стапи во сила соработката за надзор на воздушниот простор на нашата земја и додава дека ако тоа не го сторела Грција, ќе го преземела или Бугарија или Турција.

Во врска со Договорот од Преспа одиме напред почитувајќи го меѓународното право и барајќи иста перцепција и од соседната држава. Секако, во оваа насока, минатата седмица беше одобрена и стапи во сила билатералната соработка за надзор на воздушниот простор на оваа држава од нашето воено воздухопловство. Ако не го сторевме ние, апсолутно подготвени да го направат тоа беа како Бугарија, која е силно негативна за Договорот од Преспа, така и Турција, која демне да ја искористи секоја можност за зголемување на влијанието на Балканот, вели Панајотопулос.

Минатиот понеделник, началникот на македонскиот Генералштаб, генералот Васко Ѓурчиновски и началникот на одбраната на Грција, генералот Христос Христодулу во Солун потпишаа Технички аранжман за надзор на воздушниот простор што претставува официјализирање на мисијата „Air– policing“, а ќе се реализира во координација со НАТО.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.