Српската премиерка Ана Брнабиќ најави дека утре во Србија ќе започне „масовна“ вакцинација на граѓаните против коронавирус, јави дописникот на МИА од Белград.

Брнабиќ изјави дека од утре ќе се вакцинираат просветните работници, припадниците на армијата и полицијата, како и новинарите.

Таа оцени дека претставниците на медиумите, особено медиумските работници кои се постојано на терен, биле вклучени во приоритетната група, на апел на медиумските здруженија, но и на барање на српскиот претседател Александар Вучиќ.

Брнабиќ апелираше до сите да аплицираат во што поголем број.

Веќе започнавме да ги покануваме лицата кои изразија интерес да бидат вакцинирани. Ве молиме, аплицирајте што е можно повеќе, колку побрзо и поефикасно го правиме ова, толку побрзо ќе се вратиме во нормалниот живот – изјави Брнабиќ, објавија од српската Влада.

Таа изрази очекување дека во здравствен смисол во текот на 2021 година, Србија ќе се врати на нормалниот живот пред пандемијата на коронавирусот.

Брнабиќ упати специјална молба до просветните работници да аплицираат за вакцинирање во што поголем број и изјави дека тоа е единствениот начин да им се овозможи што е можно подобро да ја завршат својата работа, истовремено заштитувајќи го своето и здравјето на нивните семејства.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.