Саманта Вучковиќ (31) која на почетокот на април беше пронајдена мртва во нејзиниот изнајмен стан во Власотинце, сепак била убиена, покажа истрагата, јавуваат српските медиуми.

Како што дознава српски „Курир“, полицијата за ова дело го сомничи момчето на Саманта Д.Р., македонски државјанин, кој веднаш по злосторството избегал од Србија.

Да потсетиме, телото на несреќната Саманта газдарицата го пронашла во кревет покриено со ќебе. Нејзиното момче Д.Р. со кого живеела таму, исчезнал пред тоа.

-До Вишото јавно обвинителство Лесковац е поднесена кривична пријава против Д.Р., државјанин на Република Македонија, поради сомнение дека свирепо ја убил Вучковиќ Саманта и на тој начин сторил кривично дело тешко убиство, а кој во моментот на поднесување на кривичната пријава не бил на територијата на Република Србија – изјавија за Курир во Вишото јавно обвинителство во Лесковац.

– Имајќи предвид дека се работи за странски државјанин, а постапувајќи согласно Законот за меѓународна правна помош во кривичната материја и Договорот меѓу Република Србија и Република Македонија, испратено е барање до Министерството за правда на Република Македонија да го преземе кривичното гонење, велат од ова обвинителство.

Како што пишуваа претходно хрватските медиуми, полицијата дошла во куќата во која живеела Саманта со судски лекар кој не можел да ја каже причината за смртта.

-Девојката била покриена со ќебе, а околу неа имало траги од крв. Наредена е обдукција која покажала дека Саманта била жртва на злосторство – изјави тогаш извор за српските медиуми.

Соседите на покојната Саманта ѝ рекле на полицијата дека не ги виделе неа и нејзиното момче најмалку седум дена и дека се сомневале дека толку долго била мртва. Саманта, како што велат, пред неколку години се преселила во Власотинце.

– Таа е родена на ова место, но се омажи и отиде во село и таму живееше неколку години. Но, таа се разведе од сопругот и се врати во Власотинце. Таа живеела со своето момче во стан сместен во куќата на главната улица – додал изворот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.