Јанез Јанша на социјалните мрежи го објави договорот за формирање на нова мнозинска коалиција, а со тоа и на нова влада, јави дописникот на МИА од Љубана.

Во медиумите веќе се познати и приоритетите и распределбата на министерствата.

Меѓу приоритетите на Владата се и постепено воведување на шестмесечен воен рок за словенечките граѓани, повеќе пари за општините, помош за младите кои сакаат да купат стан, социјална реформа, нови закони во областа на здравството, воведување на електронски вињетки, како и изградба на нови железнички линии. Еден од приоритетите на новата влада ќе биде продолжување на поддршката на земјите од Западен Балкан и нивниот евро-интегративниот процес.

Што се однесува до поделбата на ресорите меѓу коалиционите партнер, партијата СДС (Словенечка демократска партија) ќе раководи со Министерствата за внатрешни работи, надворешни работи, финансии, животна средини, култура, Служба за дијаспората, како и со Службата за европска и кохезиска политика.

На партијата СМЦ (Партија на Модерен Центар) и припаднаа Министерството за индустриски развој и технологија, тоа за образование, наука и спорт, како и Министерствата за правда и јавна управа.

Партијата Нова Словенија ќе ги добие Министерството за одбрана, труд и социјална политика и Министерството за инфраструктура.

ДеСУС (Демократска Партија на пензионерите во Словенија) ќе раководи со Министерството за здравство, земјоделие и Управата за демографија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.