Хакерите  од иранската група “Татковинска правда”  не престануваат со објавување податоци до кои дојдоа по кибер-нападите врз албанските  владини системи.

На нивната веб-страница групата објави податоци за директорот на албанската тајна служба, ШИШ, Хелидон Бендо, како и датумите на излез и влез за него од ТИМС  системот.

Објавувањето на овие податоци доаѓа откако пред два дена  групата објави  податоци со наслов „телефонски броеви на Албанците“. На мрежата можете да најдете илјадници телефонски броеви на албански државјани, име, презиме, како и броеви на лични карти, јавија албанските медиуми.

Хакерите преземајќи ја одговорноста за кибер-нападите на објава  напишаа дека причина за нападот е поддршката за муџахедините кои се засолнети во кампот на МЕК во Манез, кај Драч.

Претходно, хакерите објавија други податоци, меѓу кои и список со 105 илјади имиња на лица осомничени за криминал,  пораки од електронски пошти на министри, како и фотографи и видеа од безбедносни камери на граничните премини и полициски комесаријати.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.