Грција денес соопшти дека сите вработени во рестораните и туристичкиот сектор низ целата земја мора да бидат подложени на редовни тестови за Ковид-19, продолжувајќи ја обврската, која претходно се применуваше само на некои острови популарни меѓу туристите, бидејќи бројот на заразени продолжува да расте.

По катастрофалната 2020 година за туризмот, Грција ги укина повеќето ограничувања, надевајќи се на барем делумно заживување на клучната туристичка индустрија во текот на летото, објави Ројтерс.

Но, по возобновувањето на бројот на лица заразени со Ковид-19 во последните неколку недели поради ширењето на заразната делта, Грција минатата недела нареди тестирање на работниците во ресторани и туристички компании кои не биле вакцинирани, и тоа двапати неделно на некои од главните острови на земјата во обид да ја спасат летната сезона.

Истото правило сега ќе важи и за работниците во овие сектори низ Грција, рече заменик министерот за цивилна заштита Никос Хардалиас на прес-конференција.

Нашата цел е нашата земја да продолжи да ја испраќа пораката дека била и ќе остане безбедна туристичка дестинација, посочи тој.

И покрај неодамнешните ограничувања, случаите на островот Миконос се раширија брзо, принудувајќи ги властите минатата недела да воведат ноќен полициски час и забрана за музика од 26 јули.

Хардалиас рече дека ситуацијата на Миконос е малку подобрена и дека властите ќе одлучат за продолжување или укинување на мерките во наредните денови.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.