Во двата најголеми бугарски града Софија и Пловдив, почетокот на масовната вакцинација против Ковид-19 започна со огромни редици. Голем број луѓе чекаат да се вакцинираат против коронавирус во болницата Пирогов во Софија, јави дописникот на МИА од Софија.

Долги редици се формираа пред болницата за итни случаи во Софија. Вакцинацијата на лица од четвртата фаза започна во една од просториите на здравствената установа, каде се користи вакцината на АстраЗенека.

Во овој момент луѓето не можат да избираат. Ова е вакцината, таа не е полоша од останатите. Вративме некои пациенти кои не беа погодни за вакцинација. Пациенти со треска, дами со силикони и ботокс, објасни началничката на Медицинскиот центар „Пирогов“, Силвија Чолакова.

Во меѓувреме, здравствените служби известија за одлив на баратели за вакцинација во втората и третата фаза од кампањата, поради што побрзо почна четвртата фаза.

Според Агенцијата за лекови, значително повеќе вакцини пристигнаа во Бугарија во последните неколку дена. Наспроти тоа, мал процент од луѓето во втората и третата фаза изразија желба за имунизација.

Во првиот ден од масовната вакцинација во Пловдив, имунизирани се 1.300 лица, соопштија локалните здравствени власти. Тие планираа вчера да бидат вакцинирани 1.000 луѓе, но тој број беше надминат поради големиот интерес на оние кои сакаат да примат вакцина.

Докторите во Пловдив очекуваат приливот да продолжи, бидејќи претстои вакцинација на членовите на одделните комисии за парламентарните избори во Бугарија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.