Српскиот член на Претседателството на БиХ, Милорад Додик, денеска изјави дека нема да одговори на повикот на обвинителството во земјата да ја објасни изјава за негирање на геноцидот и потврди дека секој обид за апсење или гонење на луѓе, според новиот законот, ќе доведе до распад на земјата.

-Немам намера да одговорам, ниту на нив, ниту на некој друг, но имам намера да одам во Сараево. Навистина ме интересира како ќе се однесуваат, рече Додик денеска за Радио Телевизија на Република Српска.

Додик оваа недела потврди дека добил покана од Обвинителството на БиХ да ја објасни изјавата со која го негира геноцидот во Сребреница, што стана кривично дело откако беше наметнат со измени во законот, од страна на високиот претставник во заминување, Валентин Инцко.

Српскиот член на Претседателството на БиХ и лидер на владечаката СНСД во ентитетот Република Српска, оцени дека вистинската цел на Инцко е да создаде раскол и поделби.

-Ние не го признаваме тој суд, не ги признаваме нивните активности. Никогаш нема да ги признаеме и ако мислат дека имаат моќ, нека не уапсат. Веднаш нека тргнат, додаде Додик.

Тој најави дека властите на Република Српска ќе го спречат гонењето на секој граѓанин на Република Српска што го негира геноцидот.

Во случај да почне судско гонењето на Србите според новиот закон, Додик рече дека тоа ќе доведе до „след на настани што ќе доведат до распад на БиХ“.

-БиХ не може да живее на овој начин на кој Бошњаците се радуваат затоа што имаат висок претставник кој работи исклучиво против Србите, рече српскиот член на Претседателството на БиХ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.