Вардар во сабота го пречекува Мотор Запорожје во рамки на 12.коло во Лигата на шампионите, но во моментов речиси никој не размислува за натпреварот.

Главна тема е состојбата во клубот, финансиските проблеми и многуте неодговорени прашања кои ги имаат играчите. Вчера си заминаа Даинис Криштопанс и Павел Атман, а очигледно незадоволството во редовите на „црвено-црните“ расте сe’ повеќе и повеќе.

Капитенот Стојанче Стоилов на денешната прес-конференција потврди дека ќе остане во клубот до крајот на сезоната, но и тој не знае ништо околу иднината на клубот, бидејќи играчите не добиваат никакви информации од раководството.

Треба да бидеме реални, Вардар со Кристопанс и без него не е ист. Ќе се обидеме да победиме, треба да видиме какви се силите, каква е главата.. вели капитенот Столе Стоилов.

Проблемите не се нешто ново за нас, долго време ги имаме, но работата е во тоа што никој ништо не кажува и никој ништо не знае. Не може да ги обвинуваме играчите кои си заминаа, секој си знае за себе. Трагично е што ние сме европски шампион, а односот кон нас е смешен“, изјави Стоилов.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.