Македонската фудбалска репрезентација вечерва со почеток од 20.45 часот е домаќин на Германија во натпревар од 8. коло во квалификациите за Светското првенство 2022 година во Катар.

Избраниците на селекторот Благоја Милевски најавуваат голема борбеност и обид за ново изненадување против силниот противник кого веќе го совладаа на гости.

Капитенот Стефан Ристовски на официјалната прес-конференција во пресрет на мечот истакна дека ќе мора секој фудбалер да посвети максимално внимание на дисциплинирана игра.

Германија е врвот на светскиот фудбал и треба да се одговори со тактичка и физичка дисциплина. Гиганти како Германија не простуваат грешки, ти даваат многу малку простор и тоа мора да се искористи кога ќе се укаже. Тие за мене се најголемата репрезентација на светот. Спортски е да се надеваш на успех, но секој меч, секој ден е нешто ново. Како искусен играч мора да кажам дека мора да се искористи сè што ќе ни се пружи – порача Ристовски.

Натпреварот ќе се игра на Национална арена „Тодор Проески“ во Скопје.

На другите две средби од ова коло играат: Романија – Ерменија и Исланд – Лихтенштајн.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.