Селекторот на фудбалската репрезентација на Македонија, Игор Ангеловски по синоќешната победа од 3-1 на Градскиот стадион во Скопје на почетокот на квалификациите за ЕП 2020, изјави е задоволен од играта и дека заслужено оствариле победа. Алиоски постигна еден погодок, Елмас два, а Пандев запиша асистенција во неговиот јубилеен 100-ти натпревар во дресот на Македонија.

На убав начин му го честитавме јубилејот на Пандев. Елмас беше одличен, со два гола му честиташе на батко Горан. Го остваривме тоа што го најавувавме, освоивме три бода. Мислам дека е сосема заслужено. Мислам дека моравме и порано да го решиме натпреварот, но на крајот добро се заврши, изјави селекторот Ангеловски по мечот.

Селекторот сепак истакна дека нема простор за еуфорија, откако дуелот со Словенија е веќе во недела и треба да се подготват за мечот во Љубљана. Словенија синоќа одигра нерешено со Израел на гости.

Не треба да не фаќа еуфорија, не очекува нов меч, против Словенија во Љубљана. Мораме да се фокусираме на овој меч. Сакам да ги повикам нашите иселеници таму да дојдат и да ни дадат поддршка, додаде Ангеловски.

Дуелот од второто коло од квалификациите за ЕП 2020 е во недела од 20:45 часот на „Стожице“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.