Фудбалската репрезентација на Македонија синоќа одигра нерешено 1-1 на гостувањето против Израел во квалификациски меч за ЕП 2020, а селекторот на „жолто-црвените“, Игор Ангеловски по мечот изјави дека е задоволен од освоениот бод, но дека жали за испуштената шанса да си заминеме со сите три.

Новото засилување на Наполи, Елиф Елмас во судиското продолжение од мечот имаше голема шанса да донесе победа откако излезе сам пред противничкиот голман, но тој реши да асистира, наместо да реализира.

Задоволни сме со бод, но можеме да жалиме за сите три бодa по големата шанса во финишот. Им честитам на моите фудбалери за прикажаната игра, покажаа уште еднаш како се бори за дресот на Македонија и ова се играчи кои никогаш не се предаваат. На стартот сакавме да го неутрализираме противникот и да добиеме играч повеќе во средниот ред, па токму поради тоа ги избрав тие фудбалери. Во секој случај ваквата игра треба да ни биде дополнителен мотив да одиме на победа во Летонија, изјави Ангеловски на прес-конференцијата.

Нашата репрезентација следниот дуел го игра во понеделник, кога гостува на Летонија во Рига од 20:45 часот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.