Тамара Тодевска вечерва со „Proud“ („Горда“) ќе настапи во втората полуфинална вечер на 64. „Евровизија“, што се одржува во Тел Авив, Израел.

Пред вечерашниот настап, Тамара ѝ испрати порака на нејзината ќерка Хана, која ја бодри мајка си од Македонија.

Ми недостигаш, мама вечерва ќе пее само за тебе, порача Тамара.

Тодевска четврти пат учествува на „Евровизија“, но првпат како солист. Таа ќе настапи под реден број 17, а придружни вокали ќе ѝ бидат Александра Јанева, Антонија Гиговска и Васил Гарванлиев. Автори на песната се Роберт Билбилов, Лазар Цветковски и Дарко Димитров, а текстот е на Коста Петров и Сања Поповска. Спотот е во режија на Чедо Поповски.

На првата полуфинална вечер на Евросонг, што се одржа завчера настапија изведувачи од 17 земји од кои 10 од Грција, Белорусија, Србија, Кипар, Естонија, Чешка, Австралија, Исланд, Сан Марино и Словенија, обезбедија настап во финалето, што ќе се одржи в сабота, 18 мај.

Прва настапи претставничката на Кипар, Тамта со песната „Replay“. Првата вечер традиционално ја отвори пејачката Нета Барзилиа, која со песната „Тоу“ минатата година победи на Евросонг во Лисабон.

И во втората полуфинална вечер десет земји ќе обезбедат пласман во финалето. На Евросонг учествуваат 41 земја, а покрај домаќинот Израел, пет земји (Франција, Италија, Германија, Шпанија и Обединетото Кралство) имаат директен пласман во финалето.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.