Лара Иванова со две јазични верзии на својата нова песна се натпреварува во изборот за македонски претставник на Евровизија 2022. Песната е насловена „Цвеќе на тагата“ (“Flower of Sorrow”), за која таа објави lyrics-видео на македонската верзија на песната на својот YouTube канал.

Лара изјави јасен личен став и желба, доколку ја добие довербата на публиката на Конкурсот за избор на македонски претставник и песна што ќе нè претставува на Евровизија оваа година. Пеењето на свој мајчин јазик Лара го согледува како многу подобра опција од пеење на странски јазик, посебно кога станува збор за пеење на Евровизија и претставување на својата земја и култура.

Јас умеам да пеам и на двата јазика, но сепак мајчиниот јазик ѝ дава душа на нашата музика. Моќната нежност на една музичка изведба е целосен круг на автентична интерпретација на една песна, посебно балада каква што е „Цвеќе на тагата. Со македонската, којашто е всушност оригиналната верзија на песната, сакав да покажам дека може да се пее и на повеќе од еден јазик. Ако публиката ми ја даде поддршката и довербата преку глас на платформата на МТВ, по шест години по настапот на Калиопи на Евровизија, лично имам желба да го продолжам паузираниот тренд и да запеам повторно на македонски јазик пред цел свет и Европа, без разлика дали во склоп на целата песна или во комбинирана верзија, вели Лара.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.