„Една ноќ ме зема, а сега те нема. Како лист ме скина, животот ми мина. Да си мерак песна да те испеам…“, се стиховите кои ја одбележаа далечната 1988 година. Темата „Да си мерак песна“, која таа година на „Макфест“ ја испеа легендарната Бисера Велетанлиќ, денес, после 33 години повторно ја оживеа пејачката Бојана Скендеровски заедно со составот „Мерак“.

Премиерата на композицијата се случи вчеравечер, песната официјално беше претставена на Јутјуб каналот на пејачката.

Темата беше авангардна и за тоа време, така што решивме многу да не ја менуваме, не сакавме да додаваме или одземаме нешто на некое дело кое е маестрално само по себе. Ја освеживме со мали промени и тоа е сè, рече Бојана.

Идејата за оваа преработка е на Марио, кој е фронтмен во составот „Мерак“ и кој го потпишува и самиот нов аранжман.

Првични автори, пак, се хрватскиот композитор Ивица Стамаќ, а текстот е на Зафир Хаџиманов кој Марио го контактирал пред неколку месеци за да побара дозвола за преработка, на што Зафир одговорил со воодушевување, но за жал не успеа да ја слушне.

Зафир беше многу среќен што сме се сетиле на оваа песна и со задоволство ни даде дозвола за снимање на оваа преработка, сакаше да ја слушне веднаш штом ќе ја завршиме, но почина непосредно пред да ја промовираме и за жал не успеавме да му ја пуштиме, раскажа Марио.

Видеото за новата верзија на „Мерак песна“ е снимено во студио „Скендеровски“, а како изгледа и звучи оваа маестрална нумера во изведба на Бојана Скендеровски и група „Мерак“ можете да погледнете во видеото во продолжение:

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.