„Рацете на Украина се врзани“ поради ограничувањата за користење на оружјето што го добива од нејзините западни сојузници за напад на руска територија, изјави денеска генералниот секретар на НАТО, Јенс Столтенберг.

Неколку земји ја ограничија употребата на оружје доставено до Украина само на нејзина територија, вклучително и Крим и Донбас, но им забранија да напаѓаат руска територија.

Затоа на Украинците им се врзани рацете и тоа многу ја отежнува одбраната, изјави Столтенберг на почетокот на состанокот на НАТО во Софија.

Мислам дека е време да се преиспитаат некои од тие ограничувања, рече Столтенберг бидејќи, како што истакна, Киев „има право да се брани“ и „има право да напаѓа легитимни воени цели надвор од Украина“.

САД, главниот снабдувач на воена помош за Украина, и Германија и некои други европски земји, не се за тоа да се дава оружје без никакви ограничувања. Меѓутоа, американскиот државен секретар Ентони Блинкен неодамна во Киев изјави дека Украина треба самата да одлучи како ќе го користи оружјето.

Не охрабрувавме напади надвор од Украина, но на крајот на денот останува на Украина да донесе одлуки за тоа како да се води оваа војна, рече Блинкен.

The post Столтенберг: Киев има „врзани раце“ бидејќи не смее да ја нападне Русија со оружје од западните сојузници appeared first on Република.

Министерот за одбрана на Косово, Ејуп Маќедонци, по денешното гласање во Парламентарното собрание на НАТО, каде Косово го унапреди статусот од набљудувач во придружна членка, вели дека сега Косово е на само чекор од полноправно членство во НАТО, што, според него, „секако ќе влијае на стабилизацијата на Балканот“, јави дописникот на МИА Приштина.

По денешната одлука на ПС на Северноатлантската алијанса, напиша Маќедонци на својата страница на Фејсбук, Косово отсега натаму ќе има право да предлага и коментира за кој било процес или документ кој се третира во тоа тело.

„Од денеска, со одлука на Парламентарното собрание на НАТО, Собранието на Република Косово има статус на придружна членка на НАТО. Така, Косово отсега ќе има право да предлага и коментира за кој било процес или документ со кој работи Собранието на НАТО. Со оваа одлука Косово е на само еден чекор од полноправно членство во НАТО, што секако ќе влијае на стабилизација на Балканот“, напиша Маќедонци.

На Парламентарното собрание на НАТО, кое од 25 до 27 мај се одржува во Косово, денеска беше донесена одлука за унапредување на статусот на Собранието на Косово од членка-набљудувач во придружна членка

The post Mинистерот за одбрана се надева дека Косово е на чекор до полноправно членство во НАТО appeared first on Република.

Пред само неколку дена ДНК во соработка со кралот на фолк музиката кај нас, Наум Петрески и виртуозот на труба - Џамбо Агушев ја објавија нивната најнова песна со наслов „Животе брате“.

Требаше само кратко време за песната да се рашири како „вирус“ и буквално да ја пеат и стари и млади од сите делови на земјата, но и сите делови на светот каде има Македонци.

Овој пат едно такво видео споделија момците од ДНК на нивната официјална страница на Фејсбук, на кое може да се видат десетина дечиња облечени во традиционални македонски носии, како во еден глас го пеат новиот хит на ДНК.

Станува збор за дечиња од далечната Австралија, поточно од Мелбурн.

На наше големо задоволство, по само 4 дена од издавањето на нашата нова песна, од Мелбурн ни стигна поздрав и кратко видео кое ни ги стопли срцата а веруваме дека ќе ве допре и вас. Точно 40 деца од културно играорно друштво „Гоце Делчев“ од Мелбурн, Австралија кои ја испеаа „Ајде, ајде” во хор. Ви благодариме за огромната поддршка и љубовта која ни ја секојдневно ни ја покажувате, стои во објавата на официјалната страница на ДНК.

The post „Ни ги стопли срцата“: ДНК објавија видео на кое 40 дечиња од Австралија во еден глас ја пеат „Ајде, ајде“ appeared first on Република.

Амар Исмани  младиот албански пејач од Скопје, е убиен синоќа во Скопје во престрелка што се случила по масовна тепачка. На Инстаграм со потресна порака се прости од него неговиот пријател Јетмир Асани.

https://republika.mk/vesti/crna-hronika/se-shto-mi-treba-vo-zhivotot-e-ubieniot-pejach-se-svrshil-pred-eden-mesets-ova-e-poslednata-objava/

- Ти го имаше мојот грб, а јас сум твој. Тешко е пријателе. Те гледав како брат. Господ да не соедини на рајот. Ќе те паметиме по твоето големо и искрено срце. Ги известувам семејството и пријателите дека џаназата ќе се изврши во Чаир џамија, додека погребот ќе биде на гробиштата Бутел - напиша Јетмир Асани.

The post Денеска ќе биде погребан убиениот албански пејач appeared first on Република.

Регулаторната комисија за енергетика ги објави новите цени на горивата кои ќе се применуваат од вечерва на полноќ.

Малопродажната цена на бензинот ЕУРОСУПЕР БС-95, се намалува за 0,50 ден/лит, во однос на малопродажната цена утврдени со одлуката за утврдување на највисоки малопродажни цени на нафтените деривати и горива за транспорт од 20.05.2024 година и со тоа малопродажната цена на ЕУРОСУПЕР БС-95 изнесува 82,50 ден/лит.

Малопродажната цена на бензинот ЕУРОСУПЕР БС-98, се намалува за 1,00 ден/лит, во однос на малопродажната цена утврдени со одлуката за утврдување на највисоки малопродажни цени на нафтените деривати и горива за транспорт од 20.05.2024 година и со тоа малопродажната цена на ЕУРОСУПЕР БС-98 изнесува 84,50 ден/лит.

Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ1), се зголемуваат за 0,50 ден/лит, во однос на малопродажните цени утврдени со одлуката за утврдување на највисоки малопродажни цени на нафтените деривати и горива за транспорт од 20.05.2024 година и со тоа малопродажната цена на ЕУРОДИЗЕЛ (Д-Е V) изнесува 73,50 ден/лит, додека малопродажната цена на Екстра лесното масло за домаќинство на (ЕЛ-1) изнесува 73,00 ден/лит.

Малопродажната цена на Мазутот М-1 НС, се намалува за 0,176 ден/кг, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 20.05.2024 година и со тоа малопродажната цена на Мазутот М-1 НС изнесува 42,453 ден/кг.

Од 28.5.2024 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 82,50 (денари/литар)
Моторен бензин ЕУРОСУПЕР БС – 98 84,50 (денари/литар)
Дизел гориво ЕУРОДИЗЕЛ БС (Д-Е V) 73,50 (денари/литар)
Масло за горење Екстра лесно 1 (ЕЛ-1) 73,00 (денари/литар)
Мазут М-1 НС 42,453 (денари/килограм)

The post Дизелот поскапува од полноќ appeared first on Република.

Нискобуџетната авикомпанија Визер во зимската сезона која почнува на 27 октомври планира да редуцира дел од линиите од Скопје, но на одделни дестинации ќе го зголеми бројот на неделни полети од Скопскиот аеродром. Причина за ваквата постапка на авиокомпанијата е проблемот со флотата и инспекцијата која се врши на сите авиони поради проблеми со моторите.

Компанијата сега има приземјено 40 авиони, пишува Ex-Yu Aviation News.

Од 27 октомври кога почнува зимскиот ред на летање авиокомпанијата ќе намали 9 линии од Скопје, иако претходно планираше да има поголем број линии.

Според новиот план на летање, неделните летови од Скопје до Шарлроа и Ајндховен се намалуваат од 5 на 4, за Берлин од 5 на 3, за Келн, Милано и за Хамбург од 4 на 3, за Хан и за Болоња од 3 на 2 и за Малта од првично планираните 4 неделни ротации на 3 неделни.

Како што беше претходно објавено, авиокомпанијата ја прекина продажбата на билети за зимата 2024/2025 на услугите од главниот град на Македонија до Бремен, Копенхаген и Стокхолм Скавста. Од друга страна, услугите кон Нирнберг ќе се зголемат од 2 на 3 неделно, за Малме од 3 на 5 неделно, а за Лондон Лутон ќе порасне од 3 на 4 неделни летови.

Визер претходно најави дека планира да се врати на растот на своите фреквенции и мрежа надвор од своите бази во Скопје од летото 2025 година, и покрај проблемите со моторот, кои се очекува да ги има уште 2 години.

The post Визер ќе скрати 9 полетувања од Скопје од 27 октомври: Поради проблеми со моторот авиопревозникот има 40 приземјени авиони appeared first on Република.

Естонскиот претседател, Алар Карис, смета дека соседните земји на Русија мора, како што наведе, „да се подготват за најлошото“ и оти Русија нема да се промени ниту по владеењето на претседателот Владимир Путин.

Карис за финскиот јавен сервис „Иле“ изјави дека најважно во моментов е да се запре „руската воена машина“.

– Ќе направиме сѐ што можеме за да ги фрлиме на колена Русија и Путин. Тогаш може да започнат сериозни дискусии за завршување на војната во Украина – рече Карис.

Портпаролката на руското Министерство за надворешни работи Марија Захарова ја коментираше изјавата на естонскиот претседател, Алар Карис.

– А како ќе го направи тоа, нека покаже – рекла Захарова.

The post Ќе направиме сѐ што можеме за да ги фрлиме на колена Русија и Путин, вели естонскиот претседател Алар Карис, а Захарова возврати-нека покаже како ќе го направи тоа! appeared first on Република.

Рано утрово во 05.00 часот во тетовски Порој, полициски службеници од СВР Тетово го лишиле од слобода Д.И.(19) од тетовско село, кој бил пријавен од неговиот 59-годишен татко дека околу 04.30 часот во дворот на семејната куќа физички го нападнал и му упатил закани.

Според пријавеното, тој употребил и метален предмет и го оштетил ветробранското стакло од неговото возило.

Од СВР Тетово велат дека тој е задржан во полициска станица и по расчистување и документирање на случајот и против него ќе следува соодветен поднесок.

The post Рано утрово уапсен 19-годишник кој го нападнал татка си, па со шипка му го искршил возилото appeared first on Република.

Поранешниот играч на Црвена звезда и Стеауа, Миодраг Белодедиќ неодамна беше приведен во Букурешт. Полицијата го фати зад воланот во алкохолизирана состојба.

Романските медиуми објавија дека Белодедиќ бил фатен под дејство на алкохол од органите на прогонот. Белодедиќ наводно го предизвикал инцидентот кога влегол во автомобилот по прославата на роденденот, по што полицијата го запрела и му проверила алкохол во крвта.

- Ме запреа кога излегов од ресторанот, од забавата. Заминав околу три-нешто. Тие дојдоа по мене и ме запреа. Тие стоеја и чекаа. Ме бркаа со полициска кола, со ротација, околу 100 метри - изјави Белодедиќ.

Поранешниот ас на Звезда признава дека направил прекршок.

- Испив две пијачки со моите пријатели. Откако полицијата ме повлече, ми даде алкотест и излегов со алкохол во крвта од 0,08. Дали сфаќаш колку бев пијан? Секако, тоа е фаул. Ме одведоа во полиција, ме држеа два часа, ми земаа крв... Им кажав дека не сум пијан, дека можам да стојам на едната нога. И 90 дена ми ја земаа возачката дозвола .

Миодраг Белодедиќ со Стеауа и Црвена Звезда го освои Купот на европските шампиони, денес Лигата на шампионите.

The post Возел дрво пијан: Уапсен легендарниот фудбалер на Звезда appeared first on Република.

Во Србија финишира изборната кампања за претстојните избори за Собранието на Град Белград, 14 други градови и за 74 локални самоуправи што ќе се одржат во недела на 2 јуни. Овие избори се значајни бидејќи може да го променат политичкиот пејзаж на главниот град, каде опозицијата, и покрај бојкотот на поголемите партии, се надева на победа против владејачката Српска напредна партија (СНС), како и во Ниш, Нови САД и Чачак, јави дописникот на МИА од Белград.

Овие избори се важни поради бројните нерегуларности при претходните избори во декември 2023 година и неуспехот на партиите согласно изборните резултати да формираат власт и да изберат нов градоначалник на Белград. По обвинувањата за купување гласови (босански автобуси) и злоупотреба на јавни ресурси и протестите, опозициските партии бараа промени во законот за локални избори за да се обезбеди праведност и транспарентност на изборниот процес. По разговорите со власта, согласно препораките на ОБСЕ, и по консултациите со претседателот на Србија, Александар Вучиќ изборите за Белград се повторуваат и се одржуваат на ист датум со локалните избори на 2 јуни. Уследија и измени на избирачките списоци, и согласно измените на Законот за единствениот избирачки список, усвоени во Собранието на Србија, гласачите кои го промениле местото на живеење по 3 јули 2023 година нема да можат да гласаат на својата нова адреса на претстојните локални и белградски избори.

Во екот на овие преговори меѓу власта и опозицијата, дојде до разидување во редовите на опозициската коалиција Србија против насилството (СПН), по што изборите за град Белград ќе ги бојкотираат Партијата за слобода и правда (ССП), Нов ДСС (НАДА), Срце и Заедно, додека на локално ниво тие ќе настапат согласно одлуките за коалицирање на локалните одбори на овие партии со останатите од СПН.

За изборите за градското собрание на Белград (110 одборници) ќе учествуваат 14 изборни листи.

Владејачките партии СНС и СПС на Ивица Дачиќ ќе настапат со една изборна листа во Белград, како и во повеќето други градови, во коалицијата „Александар Вучиќ – Белград утре“ која ја сочунуваат вкупно 13 политички партии.

Опозициските партии од поранешната коалиција „Србија против насилството“ кои нема да ги бојкотират изборите-Народното движење на Србија, Зелено-левиот фронт/Не го давиме Белград, Демократската партија (ДС), Движењето на слободни граѓани (ПСГ), Еколошкото востание и Новото лице на Србија одат во коалиција со изборната листа „Го избираме Белград – Добрица Веселиновиќ – Милош Павловиќ“.

Останатите изборни листи што ќе учествуваат на изборите во Белград се: „Руска партија-Срби и Руси браќа засекогаш“, „Чале, ова е за тебе“, „За зелен Белград – Кога ако не сега – д-р Дејан Жујовиќ“, „1 од 5 милиони – Белградски фронт-Ритам на градот – Душан Теодосијевиќ градоначалник“, „Ние силата на народот проф. д-р Бранимир Несторовиќ“, „Народна листа-клуч за победа“, „Белград – нашиот град“, „Сојуз на Ромите на Србија – за Белград“, „Белград е свет-Партија на правдата и помирувањето – Усама Зукорлиќ, „Д-р Саво Манојловиќ – Јас сум Белград – Крени-Промени“, „Саша Радуловиќ – Доста беше (ДЈБ) – Решение за промени“, „Ние – глас од народот“.

Покрај изборите за градското собрание на Белград, белграѓани ќе гласаат и за советници во 17-те белградски општини: Чукарица, Нови Белград, Палилула, Раковица, Савски венац,

Стари град, Вождовац, Врачар, Земун, Звездара, Бараево, Гроцка, Лазаревац, Младеновац, Обреновац, Сопот и Сурчин.

Истиот ден, 2 јуни, ќе се одржат избори и во градовите: Нови Сад, Ниш, Суботица, Зрењанин, Кикинда, Вршац, Панчево, Сомбор, Сремска Митровица, Ваљево, Пожаревац, Јагодина, Ужице и Чачак.

Избори ќе се одржат во уште 51 општина во Србија: Ада, Алексинац, Алибунар, Апатин, Ариље, Бач, Бачка Паланка, Бачка Топола, Бачки Петровац, Бечеј, Бела Црква, Беочин, Бољевац, Босилеград, Бујановац, Чајетина, Чока, Горни Милановац, Инѓија, Ириг, Ивањица, Кањижа, Ковачица, Ковин, Мали Иѓош, Нова Црња, Нова Варош, Нови Бечеј, Нови Кнежевац, Оџаци, Опово, Пеќинци, Пландиште, Рашка, Рума, Сента, Шид, Сјеница, Србобран, Сремски Карловци, Стара Пазова, Сурдулица, Свилајнац, Шврљиг, Темерин, Тител, Тутин, Врбас, Врњачка бања, Жабаљ и Житиште.

The post Неделава Србија повторно оди на избори, за град Белград и на локални избори appeared first on Република.

Зошто да ја разрешам, кажа министерот за здравство, Илир Демири на новинарско прашање зошто не е разрешена организациската директорка на Клиниката за Токсикологија, Бесија Иљази откако претходно кажа дека веднаш би ги остранил лицата од таквите позиции.

Сте се фатиле околу Бесија. Таа не ги вработиле тие 18 лица, туку се вработени во 2023. Каде бевте вие и останатите директори и министрите да кажувате за квалитет и неквалитет? Зошто дозволувате тие луѓе да се на список на дежурства и смени, а месец дена пред изборите, реагирате зошто се вработени? Имам факти дека медицинскиот директор заедно со другиот колега кои се трудеа да направат мобинг, сум ги разрешил. Бесија кога ќе го заслужи законот, ќе биде разрешена. Таа не го прекршила законот. Каде беше ДСЗИ кога тие пет месеци не примале плата и да реагираат? Каде е ДСЗИ да достави извештај за случувањата на хируршките сали - праша Демири, критикувајќи дека Инспекторатот добива новинарски извештаи пред него како министер.

The post Сте се фатиле околу Бесија, таа не го прекршила законот, им порача Демири на новинарите appeared first on Република.

Разрешен е директорот на Клиниката за кардиохирургија, д-р Марјан Шокаровски, кажа денеска министерот за здравство Илир Демири.

До мене стигнаа наоди дека е зголемена смртноста на Клиниката. Формирав Комисија и извештајот го добив во петокот и немаше никакви значајни отскокнувања. Но, денеска добив друг податок, дека за 170 пациенти не се поднесени информации во „Мој термин“ во однос на отпусни писма и умреници, така што претпоставувам дека таа бројка на смртност може да се промени. Јас сум министер во заминување и сакав да го одложам ова, но денеска решив да го разрешам д-р Шокаровски, рече Демири на прес-конференција во Министерството за здравство.

На прашање кој ќе го замени директорот, министерот вели дека ќе го остави тоа прашање, но ако тој се прашува тоа нема да биде вработен во кардиохирургија. И веќе формирал нова комисија за превенција од кардиоваскуларни заболувања која ќе консултира светски истакнати стручни лица.

The post Демири го разреши директорот Шокаровски поради висока смртност на Кардиохирургија appeared first on Република.

Филмот на американскиот режисер Шон Бејкер победи во конкуренција на 21 филмско дело, вклучувајќи ги и делата на истакнати режисери како Френсис Форд Копола и Дејвид Кроненберг.

По проекцијата во вторник, „Анора“ доби аплауз кој траеше седум и пол минути, а публиката аплаудираше за време на прикажувањето на двочасовниот филм.

Бејкер ја прими наградата со ѕвездата на неговиот филм Мајки Медисон и им рече на толпата дека „не знае што се случува во моментов“. На Џорџ Лукас му беше доделена почесна Златна палма, која му ја врачи неговиот стар пријател и некогашен соработник Френсис Форд Копола.

Хрватскиот краток игран филм „Човекот кој не можеше да молчи“, на режисерот и сценарист Небојша Слијепчевиќ ја освои Златната палма за најдобар краток филм.

The post Златна палма за „Анора“ на режисерот Шон Бејкер, трогателната драма со комични елементи за млада егзотична танчерка која влегува во врска со син на руски олигарх appeared first on Република.

Родените од 1955 до 2004 година ги чекаат седум години неверојатна среќа, тврди најпознатиот руски астролог Василиј Володин.

Проверете дали вашиот датум на раѓање е меѓу нив

1955 - 1960. GODINA

1960 - 1966. GODINA

1966 - 1971. GODINA

1971 - 1977. GODINA

1977 - 1982. GODINA

1982 - 1988. GODINA

1988 - 1993. GODINA

The post Проверете дали сте вие: Родените од 1955 до 2004 година на овие датуми ги чека неверојатна среќа appeared first on Република.

Претставата "Мац, мац!" во режија и кореографија на Филип Петковски и ко-продукција на Пресврт, Театар "Џинот"- Велес и Гете Институтот ја доби наградата за најдобра претстава од студентското жири на овогодинешниот Интернационален театарски фестивал во Приштина (Prishtina International Theatre Festival) кој се одржа помеѓу 20 и 26 мај.

Во натпреварувачката програма на фестивалот учествуваа Народниот театар од Сарајево, Интегра од Приштина, Ерато Театар и ХНК од Загреб, Експерименталниот театар "Кујтим Спахивољи" од Тирана и Народниот театар од Подгорица. Жирито составено од Фатос Бериша (режисер), Ана Вукотиќ (режисерка) и Амернис Нокшиќи (актерка) пак, додели четири награди односно за најдобро одиграна улога, за најдобро одиграна споредна улога, за најдобра режија и за најдобра претстава, додека награди за најдобра претстава беа доделени и од страна на публиката, како и од жирито составено од новинарите Теута Арифај (АТВ), Лумира Келменди (РТК) и Адриана Пајазити (КултПлус). За најдобра главна улога беа номинирани актерите Ведран Чешарек и Ана Јовановска, додека за најдобра режија беше номиниран и режисерот Филип Петковски.

Актерите и режисерот од "Мац, мац" кои настапија на фестивлот на 23 мај велат дека се изненадени од високото ниво на професионализам и беспрекорна организација од страна на организаторите на фестивалот кои групата ја пречекале со сите почести. На свеченото доделување на наградите, режисерот Филип Петковски изјави дека е радосен што студентите од Приштина ги препознале стилот и естетиката на претставата како релевантни и дека е почестен што фестивалот дал шанса на претставници од независната сцена од Македонија, во која битно место завземаат и студентите, да бидат во официјална селекција со националните театри од регионот.

Во склоп на фестивалот, режисерот одржа и работилница по пост-драмски театар пред група на млади актери и студенти по актерска игра од Косово на кои им ја демонстрираше Вјупоинтс техниката по која е работена претставата. По успешното гостување во Приштина, претставата наскоро ќе гостува и во Скопје, како и на затворањето на Интернационалниот фестивал за алтернативен театар ФИАТ во Подгорица на 14 септември 2024 година, кој е од натпреварувачки карактер.

Фото: Јили Бериша

The post Награда за најдобра претстава за “Мац, мац” на Интернационалниот театарски фестивал во Приштина appeared first on Република.

Некаде пред 30 години се градени салите и тогаш е поставена инсталацијата за снабдување со кислород. Точно 30 години е компресорската станица. Пред месец дена имаше хаварија во станицата кога се расипа еден од компресорите и доведе до оштетување и влезе масло во тие цевки, по што компресорот е надвор од употреба. Клиниката за хирургија функционираше со два компресори кои поминаа технички преглед од две независни институции - информира министерот за здравство, Илир Демири за ситуацијата со затворените хируршки сали на Клиничкиот центар во Скопје.

Додаде дека побарал од менаџерите на Центарот да поднесат барање, за да можат да се сервисираат компресорите.

Пред девет дена се случи истиот проблем и се појавува лоша миризба во мрежата на кислород и компромиран воздух. Повторно ги повикавме независните фирми кои спроведоа испитување. Бидејќи во Македонија нема лиценцирана лабораторија која може да даде дозвола или уверение кое ќе послужи за квалитетот за испорачаните гасови, побаравме од странска компанија и денес се испратени мостри во Германија. Од двете независни компании со лаборатории не виделе никаков недостаток во квалитетот на гасови и препорачаа да се менуваат филтрите од компресорките станици - рече министерот на прес-конференција со медиумите.

Демири обелодени дека постигнале договор за алтернативно решение – да се оперираат само итни случаи, односно дистрибуцијата на пациенти да биде за неврохируршки потреби во Градската болница, додека за другите интервенции во болницата „8-ми Септември“. Министерот истакна и дека набавени се шест компресори и можат да послужат за итни и неодложени интервенции и за пациентите кои се на КАРИЛ.

Бидејќи е необјасниво, побарав од Обвинителството да спроведе истрага и да се пронајде причината за проблемот. Додека не заврши испитувањето од Германија и не дојдат анализите, Клиничкиот центар ќе се послужи со надворешни компресори, кажа Демири пред новинарите.

The post Ги чекаме анализите од Германија: Демири објасни зошто биле затворени хируршките сали appeared first on Република.

Вчера во 07.55 часот во СВР Куманово било пријавено дека на локалниот пат кој води од с.Коњух кон с.Бељаковце, кај место викано „Ракле“, кратовско, патничко возило „даеву матиз“ со скопски регистарски ознаки, управувано од Ж.Ј.(75) од с.Марино, општина Илинден, излетало од коловозот и паднало во Крива Река.

Од здобиените повреди на местото на несреќата починале возачот и неговата сопатничка С.Ј.(76) од с.Марино.

Лекар од Итна медицинска помош констатирал смрт, а по наредба на јавен oбвинител телата на починатите биле предадени на обдукција.

Увид на местото извршила увидна екипа од СВР Куманово.

The post Маж и жена загинаа откако со „матиз“ паднаа во Крива Река appeared first on Република.

Филмот „Страста на Доден Буфан” во режија на Тран Ан Хунг е реализиран во француско-белгиска копродукција со актерите Жилиет Бинош, Беноа Мажимел, Емануел Сaленже и други. Филмот е номиниран за три награди „Цезар” во 2024 и е лауреат на Наградата за сценографија на Канскиот фестивал во 2023 година.

Според критиките во француските медиуми, „Страста на Доден Буфан” е „создаден за врвно уживање, во филмот на неверојатен начин се прикажани уметноста на грижливо готвење и свесната дегустација” напиша „Bande à part”, додека „France Info Culture” посочува дека „Тран Ан Хунг ни приредува фестивал во сите бои преку подготвување оброци, нивно служење и дегустација, во опуштен амбиент во којшто забавното преминува во суштинско”.

21 МАЈ (ВТОРНИК) 18:00 ч.

ВКУСОТ НА ЉУБОВТА
(La Passion de Dodin Bouffant)
Игран филм, Франција
2024, 135 мин, ДЦП
Режија: Ан Хунг Тран (Anh Hung Tran)
Сценарио: Марсел Руф, Ан Хунг Тран (Marcel Rouff, Anh Hung Tran)
Улоги: Жилиет Бинош, Беноа Манжимел, Емануел Салинџер (Juliette Binoche, Benoit Magimel, Emmanuel Salinger)

Ненадминливата готвачка Ежини веќе дваесет години работи за познатиот гурман Доден. Како што минува времето, гастрономската пракса и меѓусебното восхитување прераснуваат во романтична врска. Нивната поврзаност создава јадења, повкусни од било кога, а кои ги збунуваат и најпознатите светски готвачи.
Сепак, Ежини ја сака својата слобода и не сака да се омажи за Доден, а тој одлучува да направи нешто што никогаш досега не го направил – тој да готви за неа.

Возрасна категорија: 13 години
Влезница: 150 денари

The post „Вкусот на љубовта“ со Жилиет Бинош, Беноа Манжимел, Емануел Салинџер денеска во Кинотека appeared first on Република.

После 6 распродадени концерти во Скопје, Владо Јаневски ќе одржи концерт на еден од дефинитивно најубавите простори во нашата држава - Античкиот театар во Охрид.

Не пропуштајте ја можноста да бидете дел од единствената и уникатна музичка приказна која на 10 август, во организација на „Прагма продукција“, ќе ја подготви Владо Јаневски.

Музичарот и кантавтор, по пауза од неколку години се враќа во Охрид, да ни го сервира својот безвременски каталог на хитови и да ги испее познатите рефрени кои се доказ дека Владо е еден од ретките пејачи кај нас, кој живее исклучиво од и за музиката.

На концертот, кој истовремено ќе биде романтичен и еуфоричен, ќе има низа на евергрини и песни кои со генерации се пеат повеќе од 30 години, а секоја негова песна е сама по себе музичка историја. Дека ќе присуствуваме на еден исклучителен музички настан, говори и големиот интерес за овој концерт, затоа што публиката не можеш да ја излажеш, посебно не 30 години колку што трае Јаневски, кој вели дека годините и искуството го научиле - ако сакаш да го насмееш Господ, само кажи му што планираш, а Владо Јаневски тоа добро го знае. Затоа, погрижете се навреме да си обезбедите влезница, бидејќи за неговите концерти секогаш се бара карта повеќе. Влезниците се веќе пуштени во продажба и истите имате можност да ги купите преку продажната мрежа на www.kupikarta.com и кај Аждер.

The post Владо Јаневски на 10 август на Антички театар appeared first on Република.

Во следните денови бугарскиот писател Петар Денчев ќе гостува во три македонски града за да го претстави преводот на своето дело „Малиот бог на земјотресот“ на македонски јазик. Турнејата ќе почне на 28 мај (вторник) од 19.30 ч. во Europe House Струмица, каде што Далибор Плечиќ ќе го модерира настанот со овој значаен автор од најновата генерација. Следниот ден, 29 мај (среда), Денчев ќе гостува во Скопје во книжарницата „Антолог“ – Центар од 19 часот. Настанот ќе го модерира Пепи Стамков, а освен авторот, ќе се обрати и преведувачот Душко Крстевски. На 30 и 31 мај Петар Денчев ќе биде гостин и на Меѓународниот фестивал на прозата во Кумново, во организација на НУЦК Трајко Прокопиев Куманово.

Настаните се реализирани со поддршка на Културно-информативниот центар на Република Бугарија во Скопје, а книгата на македонски јазик е објавена во рамките на проектот Создадено во Европа: моќта на различноста кофинансирано од програмата Циркулација на европски книжевни дела на Креативна Европа на Европската Унија – Потпрограма „Култура“.

Книгата започнува како и многу други: со разделба. Една жена го напушта својот маж без некоја посебна причина. Го прави тоа старомодно, со белешка напишана на рака. Тој не изгледа изненаден, дури на почетокот воздивнува со олеснување дека не ѝ се случило ништо лошо. Така навлегуваме во светот на еден нереализиран филозоф кој е сопственик на цвеќарница. Во обид да ја открие мистеријата на исчезнувањето на неговата сопруга, презема трауматично патување во минатото – во својот гардеробер, среде руините на татковата куќа, по софиските улици, на брегот на Дунав, среде чаршијата во Скопје.

„Малиот Бог на земјотресот“ претставува прекрасна приказна која проникнува во скриените односи на животот.

Петар Денчев (1986) е бугарски писател и театарски режисер. Дипломирал театарска режија и поставил претстави во најголемите театри во Бугарија. Книжевното деби го прави со раскази и поезија кои веднаш се наградени или номинирани на разни конкурси. Автор е на книги поезија, раскази и романи. Има објавувано во речиси сите бугарски весници и списанија како и во американското „The Litter Box Magazine“ и на хрватскиот сајт „Критична маса“. Преведен е на неколку јазици.

Блог: https://peterdentchev.wordpress.com/

Душко Крстевски е роден во 1981 година во Скопје каде се школувал и моментално работи. Дипломира на Катедрата за македонска книжевност и јужнословенски книжевности на Филолошкиот факултет „Блаже Конески“ при скопскиот универзитет „Св. Кирил и Методиј“. Во 2013 година ја објавува поетската збирка „Алхемија на 21 век“. Застапуван е во неколку антологии на македонската млада поезија и учествува на неколку поетски фестивали. Работи како професор по македонски јазик и литература во Меѓународните училишта НОВА во Скопје. Од бугарски јазик ги има преведено делата на: Кристин Димитрова, Здравка Евтимова, Георги Господинов, Васил Георгиев, Алек Попов, Александар Секулов, Захари Карабашлиев, Виктор Пасков, Калин Терзијски, Добромир Бајчев, Петар Денчев и многу други.

The post Бугарскиот писател Петар Денчев ќе гостува во три македонски града за да го претстави преводот на своето дело „Малиот бог на земјотресот“ на македонски јазик appeared first on Република.