вторник, 20 ноември 2018 | Вести денес: 83 ново

Заврши најголемото модно шоу во Македонија (галерија)

Со ревиите на „Error Kolektiv“, Сара Реџиќ и Александра Јовановска во „Скопје Мериот Хотел“ вчеравечер заврши најголемото модно шоу во Македонија, осумнаесеттото издание на Моден викенд Скопје за сезоната есен-зима 2018/2019.

Во претходните три дена на Моден викенд Скопје се претставија и студентите од Академијата за моден дизајн „Џолев и уметностите“ („Сивус едукативен и развоен центар“ ) кои ги прикажаа своите финални колекции работени под менторство на дизајнерите Никола Ефтимов, Никола Булески-Буле и Александра Јовановска.

Третиот ден ревии имаа Емануела Трајческа со колекцијата „Оклоп“, Натали Наумова со „Still“, Катерина Тошева со колекцијата „Огледало“, Мила Спасовска со „Плима“, Марија Десподовска со „Movement“ и Сара Реџиќ со колекцијата „Малиот принц“.

Познатиот бренд за италијански накит „SIGMA“ ја донесе новата колекција насловена „Future now“ која трасира нова љубов кон златниот накит, истакнувајќи го личниот стил, префинетоста и елеганцијата на една жена.

Првпат на Моден викенд ги видовме „Matrons dresses“ и колекцијата за есен/зима 2018/2019 „Magical
feathers“ составена од 20 креации.

Третата вечер на осумнаесеттиот Моден викенд Скопје заврши со ревијата на Олгица Ѓоргиева и
колекцијата „Bridges“ поддржана од „БИСИ“, „Soul Kitchen Bar“ и „Bella Vista“. Креациите беа надополнети со
чевли од „Shevro“.

-Мостот е структура која е изградена преку железнички станици, реки, патиштата за да можат луѓето да
поминат од едно место на друго. Симболичното значење од многу аспекти е разработено на еден суптилен
начин во најновата колекција. Низ историјата па и денес, мостовите се конекција за многу работи во нашето
секојдневие: мост на пријателство, мост на љубовта, на емоции, мост со самиот себеси, мост на соработка …
листата е долга – вели за својата колекција Ѓоргиева.

Вториот ден од Моден викенд Скопје започна со модната инсталација и перформанс од финалниот дел на проектот #sustainablestorymk.  На капсулните колекции изработени од текстилен отпад работеа Емануела Трајческа, Сара Реџиќ, Ева Зарезанкова, Натали Наумова ,Радица Лазова, Катерина Димитровска, Мирјана Јосифоска и Дана Ќосева под менторство на дизајнерката Ирина Тошева и гостинките од Велика Британија односно талентираната дизајнерка Ана Скодбо и една од водечките британски стилистки Ребека Рој.

Гостинките кои долго време работат на одржлива мода, на младите дизајнери им предаваа за техниките за бавно производство, одржливи ткаенини, сертифициран органски памук, производство на нула отпад, вегански материјали и етички услови за производство. На модниот перформанс манекенките ги носеа чевлите од „Schuster“.

Целиот проект го реализираше Моден викенд Скопје со несебичната поддршка од Македонско Модно Здружение, Министерството за економија на РМ, Министерството за култура на РМ , Британскиот совет како и партнерите „Текстилното трговско здружение- Текстилен кластер –Македонија“ во соработка со
фабриките „Okitex“, „La dama“, „Bella“, „AFG“ и „Istkomerc Sanda“, „Monika“ и „Fjer“. Активно учество и
поддршка дадоа и граѓанската мрежа „АјдеМакедонија!“, “Екотип” како и Академијата за моден дизајн
„Џолев и уметностите“ и „Сивус едукативен и развоен центар“.

Со нетипичен моден перфроманс дизајнерката Ирина Тошева ја презентираше колекцијата за есен-зима
2018/2019 . „Гепардот својата енергија ја согорува од срцето. Повремено зрачи како страсна супернова. Го
чека вистинскиот момент и никогаш не се откажува. Колку сила и енергија им даваш на другите? Веруваш ли
во својата истрајност да го заштитиш она што е твое, тогаш кога е најважно?“ праша Тошева низ новите
креации.

Првпат на Моден викенд Скопје ги видовме моделите на дизајнерката Теодора Митровска од
колекцијата “We Are Not Machines” со која беше дел од неодамнешното отворање на модната недела во
Рига. Колекцијата е инспирирана од текстилни работници и е критика на брзата мода и условите во кои
истата се произведува. Преку креациите се преиспитува тенката линија помиѓу човек и машина по која, за
жал, многу од овие работници се движат. За оваа цел во колекцијата се среќаваат парчиња од
неконвенционални материјали како ПВЦ, индустриска гума и цврста пластика кои го трансформираат телото во надчовечко.

Пред македонската публика првпат беа презентирани и модните парчиња на Кренаре Ругова кои се „изработени користејќи бавна мода за да претстават нови форми на размислување однапред“.
Вечерта заврши со колекцијата „Full of Grace“ на дизајнерката Силвија Михајловска поддржана од „Amstel“.
Станува збор за дневни и вечерни креации инспирирани од Грејс Џоунс која е позната актерка, модел и
пејачка. Михајловска оваа 2018 година заокружува два нејзини зачајни јубилеи, 20 години од првата
самостојна ревија на ФЛУ, како и 10 години од постоењето на нејзиното модно ателје “Алшар“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.

Top