среда, 26 септември 2018 | Вести денес: 1 ново

Документарен филм за легендарниот хотел „Југославија“ во Белград вечерва во Кинотека

Од 13-ти септември (четврток), во Кинотеката на Македонија (20ч.), Центарот за култура „Браќа Миладиновци“ – Струга (19ч.) и Центарот за култура „Ацо Ѓорчев“ – Неготино (19.30ч.) се прикажува филмот „Хотел Југославија“ во режија на Никола Вањиер.
Изграден во Белград во 1969 година, хотел „Југославија“ беше митско место. Тој беше најголемиот хотел на Балканот, и симбол и сведок на разни моменти што ја обликуваа поранешна Југославија: Од Тито до Милошевиќ; од социјализам во национализам; од бомбашките напади на НАТО до корумпиран економски либерализам. Југославија повеќе не постои, но хотелот сé уште го прогонува белградскиот пејзаж, како одраз на српското општество во потрага по нови пресвртници. Со разгледување на различните простори и епохи на зградата, со собирање на сеќавањата на оние што живееле во него, режисерот – со југословенско потекло преку неговата мајка, но роден и израснат во Швајцарија – создава единствен простор-време во кое на површина испливува колективното несвесно како и дел од неговиот идентитет.
За швајцарскиот режисер документарниот филм е еден вид потрага за „изгубеното кралство“. Откриваме и дознаваме за ова место кое е симбол на една ера преку долга листа на негови привремени познати и непознати посетители, и гледаме од далечина како една зграда може да воспоставува идеологии и национални идентитети, но исто така да стои исправено пред колапсот на колективната меморија.
Филмот беше прикажан во програмата „Панорама“ на Берлинскиот филмски фестивал, а беше и во главната натпреварувачка програма на Документарниот филмски фестивал во Солун. Филмот продолжува со прикажување на 26 септември во Гостивар од каде и во другите градови низ Македонија.
Дистрибутер за Македонија е „Катавеј“, а дистрибуцијата е поддржана од „Свис филмс“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.

Top