недела, 21 октомври 2018 | Вести денес: 52 ново

Официјален документ: Владата плаќа над 500 000 евра годишно за советниците на Заев (видео)

ТВ21 објави документ од владиниот кабинет за 55 експерти кои што го советуваат премиерот Заев, а кои ги чинат граѓаните вкупно 45.783 евра месечно или речиси над половина милион евра на годишно ниво. Според официјални податоци – 10 советници, 13 специјални советници и 32 надворешни соработници се ангажирани во кабинетот на премиерот во периодот од јули 2017 до март 2018 година.

Според пресметките, просечната плата на овие експерти изнесува 950 евра месечно, односно 11.450 евра годишно.

– 10 Советници заедно примаат месечна бруто плата 10.588.00 евра или над 127 илјади евра годишно. 13 специјални советници добиваат месечна бруто плата од 15.870.00 евра или 190 илјади евра годишно, велат од Владата на РМ, Кабинет на премиерот.

Од почетната листа со 56 советници повлечен е Џезаир Шаќири, познат како Командант Хоџа, кој беше назначен за надворешен соработник за внатрешна безбедност и борба против радикализмот. Со највисока месечна плата од 1.500 евра, на чело на листата е Зоран Башановиќ, надворешен соработник за економски прашања. 7 од надворешните соработници се доброволно ангажирани, без паричен надомест.

– 32 надворешни соработници добиваат хонорар, ангажирани се со едногодишен договор и за нив не се плаќаат придонеси за здравствено и пензиско осигурување. Месечните приходи за сите надворешни соработници ја достигнуваат бројката од 19.355.00 евра месечно, или 232 илјади евра годишно, Влада на РМ.

Од Здружението на даночните советници на Македонија велат дека големиот број советници се непотребен товар за граѓаните. Претседателот на ова здружение, Павле Гацов, рече дека владата имала вработени лица по секторите, кои се квалификувани за вршење на истата функција без притоа да има потреба од посебни советници или надворешни соработници во кабинетот на Заев.

(извор – ТВ21)

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.

Top