петок, 19 октомври 2018 | Вести денес: 0 ново

Пронајдени фосилни остатоци од изумрен вид на слон во близина на Долни Дисан

Од Националната установа Природонаучен музеј на Македонија информираат јавноста за уникатно палеонтолошко откритие во близина на с. Долни Дисан, Неготино и за палеонтолошките ископувања кои во моментот се одвиваат, за колекционирање и конзервирање на пронајдени фосилни остатоци од изумрен вид на слон.


Палеонтолошки екипи од Природонаучниот музеј на Македонија и Природонаучниот музеј во Софија, од 20ти април 2018 година започнаа со ископување на фосилни остатоци од изумрен вид на слон (Choerolophodon pantelici), чија старост прелиминарно се проценува на околу осум милиони години.

-Фосилните остатоци беа откриени при заедничката теренска работа кај с. Долни Дисан во 2017 година. Досега откриените коски укажуваат дека се работи за зачуван значаен дел од скелетот на слонот. Според мислењето на стручниот тим, се работи за наод со големо научно значење. Фосилни остатоци од овој вид на слон се најдени на повеќе локалитети во Македонија и ширум Евроазија, но комплетен скелет од ова животно досега не и е познат на науката. Ова го прави наодот уникатен во светски рамки, затоа што ќе одговори на повеќе прашања за изгледот и начинот на живот на овој предок на денешните слонови.
Со поддршка од Министерството за култура преку програмата за музејска дејност, стручен тим од Природонаучниот музеј на Македонија раководен од м-р Биљана Гаревска, заедно со стручна помош од палеонтолози од Природонаучниот музеј од Софија предводени од д-р Николај Спасов, во деновите кои претстојат ќе ги колекционираат ископаните остатоци. Се надеваме дека во блиска иднина фосилните коски ќе бидат конзервирани и претставени на македонската и меѓународната јавност, преку соодветно изложување во просториите на Музејот, велат од Музејот.

По својата старост (видот живеел пред 8 до 7 милиони години), овој вид слон е постар од мамутите (5 милиони – 4500 години). Населувал суви тревести живеалишта еквивалентни на денешните африкански савани. Живеел задно со предци на денешните жирафи, сабјести тигри, примати и други изумрени видови од периодот на миоцен.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.

Top