петок, 22 јуни 2018 | Вести денес: 74 ново

Одрони на патот Велес-Градско: Прекинат железничкиот и патниот сообраќај (видео)

За малку е избегната несреќа со трагичен епилог, кога утрово, нешто после осум часот, огромни карпи се откинаа од овој рид и паднаа на патот и железничката пруга Велес – Гевгелија. Неколку секунди подоцна, возило за одржување на пруги удри во карпите. Машиновозачот Симон Велинов, кој не сакаше да зборува пред камера, раскажа дека само што го видел одронот, почнал да кочи.

Откако видел дека растојанието до одронот е мало, на своите двајца колеги кои биле со него во кабината панично им викнал да се држат цврсто, бидејќи ќе удрат во карпите. Еден од нив не успеал да се задржи доволно, па со глава удрил во железната конструкција на кабината. За среќа, поминал со полесна повреда. Несреќа била избегната и на патот. Автобус за влакно избегнал карпите да го затрупаат.

Каблите кои одронот ги соборил, паднале врз каросеријата на автобусот. Но, никој не е повреден. Луѓе чии куќе се непосредно до високиот карпест рид, не паметат ваков одрон, но велат дека со години ги предупредувале властите дека може да дојде до несреќа. Овој пат е многу фрекфентен. Се наоѓа во месноста долни дуќани, на јужниот излез од Велес кон Градско. Освен возила, по него често се движат и велосипедисти и пешаци, па вистинска среќа е што денеска никој не настрада.

Од општина Велес информираат дека регионалниот пат ќе биде забранет се додека не се исчисти одронот и не се создадат услови за нормално движење. Проблем е и отстранувањето на железничкото возило, чии тркала се оштетени и можат да ја деформираат пругата.

извор 24 вести

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.

Top