недела, 23 септември 2018 | Вести денес: 2 ново

МВР потврди дека „Делукс Ауто Куманово“, е фирмата од која купуваат возила

„Делукс Ауто Куманово“, е фирмата од која МВР купува возила „шкода“ од 1 милион евра, донација на Република Чешка, потврдиле од министертсвото за Алфа. Оваа фирма свиркачите на „Џастпејстит“ ја поврзаа со владеачката партија, пишуваа дека „Делукс Ауто Куманово“ ја има во два годишни финансиски извештаи на партијата, односно дека кумановската компанија, давала услуги на СДСМ во 2015 и 2016 година.

Компанијата од Куманово, не е овластен дистрибутер на „шкода“ туку дилер на возилата, сепак нивната понуда била најповолна за купување на 45 возила, тврдат од МВР, од каде убедуваат дека во постапката се испочитувани сите законски процедури. За оваа зделка не бил објавен јавен оглас,за јавни набавки, туку МВР одлучиле постапката да оди со преговарање, поради како што велат од таму, крајна итност.

„Откако од страна на Советот за јавни набавки е доставено решение со кое се дава согласност за користење на постапката со преговарање без објавување на оглас од причини од крајна итност, покана за учество во преговарање е доставена до следниве економски оператори: МакАутостар Скопје, Маккар Скопје, Делукс Ауто Куманово и Порше Македонија Скопје. Како најповолна понуда е избрана понудата на понудувачот Делукс Ауто Куманово“ – се вели во одговорот на МВР за Алфа Телевизија.

МВР на 29 август годинава го потпишале договорот со кумановската компанија „Делукс Ауто“ на висина од 62.806.500 денари без ддв за набавка на 45 возила. Со договорот Делукс Ауто Куманово е задолжен да врши сервис следните 3 години, како и да обезбеди летни и зимски гуми за возилата.

Ова е втора донација на Чешка за македонската полиција, во 2016 беа донирани 740.000 евра. Од тие пари тогаш беа купени 25 „шкода јети“, за потребите на граничната полиција на јужната граница и за справување со мигрантската криза. Набавката на возилата беше од овалстениот дистрибутер во Скопје и тогаш постапката беше без јавен оглас, поради крајна итност.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.

Top