вторник, 23 мај 2017 | Вести денес: 3 ново

Одложени се состаноците на Могерини во Сараево

Авионот на високата претставничка за надворешна политика и безбедност на Европската унија Федерика Могерини, утрово не успеа да слета на Меѓународниот аеродром во Сараево, па поради тоа е одложен состанокот со членовите на претставништвото на Босна и Херцеговина.

Нема информации кога ќе биде одржан состанокот со членовите на претставништвото на БиХ.

– Од изутринава поради густата магла ниту еден авион не слета на аеродромот – соопштија од Информативната служба на Меѓународниот аеродром во Сараево.

Имено, Могерини, која синоќа престојуваше во Подгорица, денеска во Сараево треба да се состане со Младен Иваниќ, Драган Човиќ и Бакир Изетбеговиќ.

Исто така, таа ќе разговара и со претседавачот на Советот на министри на БиХ Денис Звиздиќ и министерот за надворешни работи Игор Црнадак.

Звиздиќ пред состанокот со Могерини истакна дека таа носи многу важна порака за БиХ, а тоа е дека вратата на Евопската унија е отворена за земјата, но и дека  брзината на нејзиното пристапување ќе зависи од  динамиката на исполнувањето на условите што и се поставени на државата.

Могерини вчера ја започна нејзината балканска турнеја во Црна Гора, каде се состана со претставниците на Владата, политичките партии и Парламентот.

– ЕУ нема да биде целосна сè додека овој регион во срцето на Европа не биде обединет, како дел од нашата заедница – порача вчера Могерини за време на посетата на Подгорица.

Високата претставничка на ЕУ од 1 до 4 март ќе престојува во земјите од регионот, а освен Црна Гора и БиХ ќе ги посети и Македонија, Србија, Албанија и Косово.

Top