понеделник, 27 март 2017 | Вести денес: 2 ново

Рударството очекува добра година

rudari

Рударскиот сектор успешно ја заврши 2016 година и покрај сите предизвици, а слични се предвидувањата и за претстојната, 2017 година. Ќе работат сите производни капацитети „Злетово“, „Саса“, „Тораница“ и „Бучим“.

Како што оцени денеска Македонската асоцијација на рударството (МАР), „Фени“ полека може да се избрише од рудните потенцијали, а „Иловица“ годинава нема да профункционира. Цените на металите, пак, на светските берзи, и во следните 12 месеци не се очекува да имаат поголем пораст, ниту значајно да се намалат.

МАР останува на барањата: да се изработи стратегија за рударството до 2025 година и да се воведе ред во давањето концесии за каменоломите.

– Изминатава 2016 година беше прилично тешка, со многу ниски цени на металите, најниски во последната деценија, Злетово и Тораница не работеа. Но, и во вака тешки услови, рударскиот сектор ја заврши успешно. Очекуваме и 2017 година да биде, исто така, успешна, уште повеќе ако имаме доволно разбирање и соработка со надлежните институции, особено со министерствата за економија и за животна средина – истакна претседателот на Асоцијацијата Николајчо Николов на прес-конференција во Стопанската комора.

Според него, за „Иловица“ треба да се постигне национален консензус зашто се работи за многу голем, сериозен капацитет, лоциран над Струмичко Поле, а „Фени“ е рудник со енормно ниска содржина на никел, која во денешни услови е неисплатлива.

– Ова дополнително ги потврдува нашите заложби за неопходноста од изработување стратегија по која треба да се владеат и домашните и странските инвеститори – нагласува Николов.

Македонија во однос на рударството, додаде, мора да дефинира што е исплатливо, што може да се копа, а што треба да остави за идните генерации.

– Мора да водиме многу поодговорна политика. На пример, јаглен и лигнит има резерви до 2030 година – 2035 година и затоа треба да се размислува колку од количините е добро да се експлоатираат, колку да се остават за следните генерации, односно колку да се користат алтернативните извори на енергија – посочи Николов.

Мора да престане, рече, и стихијното отворање каменоломи зашто тоа негативно влијае не само врз економијата, туку и врз екологијата.

– И покрај честите укажувања на МАР, се отвораат каменоломи блиску еден до друг поради што се добива впечаток дека движиме хаотично, без конкретни планови и потреби – подвлече претседателот на Асоцијацијата.

МАР предупредува и на дивото ископување на песокот по реките и локациите каде што се градат станови и други видови објекти.

Индустриското производство во секторот рударство и вадење камен во периодот јануари – ноември 2016 бележи пад од 16,8 отсто во однос на истиот период во 2015 година, а кај неметалите зголемување од 18,2 процента. Зголемување на производството генерално, во двата сегмента, се очекува пред се поради рестартирањето на старите и отворањето нови рудници, како и поради задржувањето на цените на металите на светската берза.

Во рударството кај нас се вработени околу 13.000 лица, а просечната нето-плата (во „Бучим“) е 450 евра.

Top