среда, 20 септември 2017 | Вести денес: 106 ново

Во организација на Британски совет и Британска амбасада: Дебати на Филолошки факултет и ФДУ „Шекспир живее“

Вилјам Шекспир, најдобриот британски поет и драматург, ќе биде актуелизиран низ социо-културниот контекст на денешнината низ неколку тематски целини: „Метаморфозите на Шекспир“ на проф. Рајна Кошка-Хот од Филолошкиот факултет при УКИМ, „Шекспир и интеркултурната комуникација“ на проф. Антоанела Петковска од Филозофскиот факултет при УКИМ и „Бескраен простор на ореовата лушпа“ на писателот Гоце Смилевски од Институтот за македонска литература

Во организација на Британскиот совет и Британската амбасада во Скопје утре, на 8 април, на Филолошкиот факултет „Блаже Конески“ и Факултетот за драмски уметности (ФДУ) во 12 часот ќе се одржат студентски дебати во рамки на проектот „Шекспир живее“, по повод годишнината на книжевниот гениј, Вилијам Шекспир. Во 2016 година се одбележуваат 400 години од неговата смрт и студентските дебати се дел од глобалната кампања „Шекспир живее во 2016“ (Shakespeare Lives in 2016). Модератор на дебатите е Ана Јовковска.

Моќ и власт, дискриминација, родов идентитет, верска толеранција, морал, етика, комуникација и популарна култура се дел од темите кои ќе се отворат низ интерактивна дискусија со студентите.

16955e60-2897-43ce-9142-39fdf04e1f2f

Вилјам Шекспир, најдобриот британски поет и драматург, ќе биде актуелизиран низ социо-културниот контекст на денешнината низ неколку тематски целини: „Метаморфозите на Шекспир“ на проф. Рајна Кошка-Хот од Филолошкиот факултет при УКИМ, „Шекспир и интеркултурната комуникација“ на проф. Антоанела Петковска од Филозофскиот факултет при УКИМ и „Бескраен простор на ореовата лушпа“ на писателот Гоце Смилевски од Институтот за македонска литература.

Првата дебата на осми април ќе ја отвори Британскиот амбасадор, Чарлс Гарет, по што ќе следува свечено обраќење на Деканката на Филолошкиот факултет, д-р Славица Велева. Настаните се од отворен карактер.

antoanela

проф. Антоанела Петковска

– Мојот дел во рамки на студентските трибини се однесува на социолошкиот дискурс на Шекспир и тоа на три клучни аспекти: Времето на Шекспир и ренесансата како револуција и контракултура, Шекспир и класно-социјалниот идентитет и статусот на литературата и театарот и Шекспир како обид за интеркултурна комуникација: време, простор, класа, род, етничност, религиозна припадност, индивидуализам versus колективизам, остварување на правда и правичност, борба со стереотипи и предрасуди, критичност или конформизам, алиенација или почитување на основните човекови права, како и емоциите наспроти рациото – вели проф. Петковска.

Темите за кои пишувал Вилјам Шекспир, односот меѓу моќта и власта, толеранцијата и нетолеранцијата (верска, расна, политичка…) и пред сè, прашањето на родот, родовиот идентитет и родовите стереотипи се и денес актуелни, вели шекспирологот Кошка-Хот.

2ead4af2-8a13-46b2-9f23-847d02c01086

проф. Рајна Кошка-Хот

– Во времето на ренесансата на жените не им било дозволено да се појават на сцена, така што женските улоги ги играле млади момчиња додека не им мутирал гласот. Во трагедиите големите хероини како единствено оружје ја имаат „храброста на својот јазик“, а секој нивен обид од маргините да се придвижат кон центарот завршува, како што вели феминистичката теорија, како „мртвиот центар“ на трагедијата. Ова, пак, го поттикнува и прашањето дали Шекспир бил протофеминист или женомразец, дали бил субверзивен или конформист. Ова е само мала провокација за разговор од многуте теми кои ќе ги отвориме со студентите – вели  проф. Рајна Кошка-Хот

Според писателот Смилевски, Шекспировиот стих што почнува со „Тo be or not to be“ продолжува со „that is the question“. Тоа е прашањето над амбисот што ги дели постоењето и непостоењето.

goce smilevski

Гоце Смилевски

– Тоа е многу повеќе од прашање за самоубиството и целиот тој монолог е крик за смислата и бесмислата на постоењето. И концентрирањето на егзистенцијалната драма на човековата судбина – да се биде или не – на неколку зборови, со тоа сведување не доживува стеснување, туку експанзија, експлозија, еден метафизички еквивалент на биг бенгот… Тоа се неколку зборови што ги опфаќаат сите човечки постоења – минати, сегашни и идни, сите човечки постоења до Шекспир до денес и од денес, па сè додека постои човечкиот род, значи од првиот до последниот човек: да се биде или не, тоа е прашањето, има ли или нема смисла ова постоење?“ – смета Смилевски.

Британски совет е меѓународна организација на Обединетото Кралство за културни врски и во основата на работата ги има културата, образованието и англискиот јазик.

Во текот на 2016 година глобално ќе ја реализираме програмата „Шекспир живее“, која ќе вклучи нови продукции на драмите на Шекспир, филмски адаптации, изложби, јавни читања и образовни ресурси за училишта и сите оние кои учат англиски јазик. Во Македонија ќе го искористиме опусот на Шекспир и општествените вредности и теми опишани во неговите драми за да вклучиме млади, студенти, образовни институции, како и познати влијателни лица за ги истражат и промовираат овие вредности преку активности во училишта, дебати и дигитални кампањи – велат од Британски совет Македонија.

Британскиот совет во Македонија, во соработка со Британската амбасада во Скопје оваа година го реазлизира проектот „Шекспир живее“. Во текот на 2016 година се одбележуваат 400 години од смртта на Вилијам Шекспир, можност да се прослави делото на овој гениј и инспирацијата која ја дал на безброј луѓе низ вековите.

Во рамки на кампањата GREAT на британската влада, Британски совет ја организира глобалната програма „Шекспир живее“ (Shakespeare Lives), за да се одбележи неговото дело и безвременско влијание ширум светот. Во соработка со партнери, вклучувајќи театри, музеи, образовни институции и уметници, програмата „Шекспир живее“ ќе вклучи нови продукции на драмите на Шекспир, филмски адаптации, изложби, јавни читања и образовни ресурси за училишта и сите оние кои учат англиски јазик, соопштија од Британскиот совет.

Top